Taith Just Love Food i leihau carbon – ei rysáit ar gyfer twf cynaliadwy

Gyda chefnogaeth Llywodraeth Cymru, datblygodd y gwneuthurwr cacennau heb alergenau Gynllun Lleihau Carbon er mwyn deall ei allyriadau'n well a nodi cyfleoedd ymarferol i leihau ei effaith amgylcheddol ar draws y busnes.

Wedi'i sefydlu gan Michael Woods ar ôl i'w ddau blentyn gael diagnosis o alergeddau difrifol, mae'r cwmni wedi tyfu o fod yn genhadaeth bersonol i fusnes llwyddiannus sy'n cyflenwi cacennau dathlu a nwyddau pobi heb alergenau i fanwerthwyr mawr yn y DU.

Wrth i gynaliadwyedd ddod yn ystyriaeth gynyddol bwysig i fanwerthwyr a defnyddwyr, mae Just Love Food wedi ymrwymo i leihau allyriadau tra'n sicrhau bod y cynhyrchion yn parhau i fod yn fforddiadwy. Hwn hefyd yw'r busnes cyntaf a gefnogwyd drwy'r rhaglen i ddatblygu Cynlluniau Lleihau Carbon olynol, sy'n dangos ei ymrwymiad i fesur cynnydd a pharhau i nodi cyfleoedd ar gyfer gwelliant.

Drwy ddadansoddi ei ddata ar gyfer 2024 a 2025, roedd Just Love Food yn deall ei ôl troed carbon yn well, a ble roedd allyriadau'n cael eu cynhyrchu ar hyd a lled y busnes. Helpodd hynny’r cwmni i ganolbwyntio ar feysydd lle gallai newidiadau ymarferol gael yr effaith fwyaf. Fel mae Michael yn egluro: "Roedd deall sefyllfa bresennol y busnes yn bwysig iawn i mi. Mae pawb yn sôn am ôl troed carbon a yn darllen amdano, ond a dweud y gwir, doeddwn i ddim yn ei ddeall nes i ni ddechrau ar y Cynllun Lleihau Carbon.

"Gyda'r ddealltwriaeth honno, roeddem ni’n gallu canolbwyntio ar y meysydd lle roedd gennym ni reolaeth, a lle gallai newidiadau wneud gwahaniaeth gwirioneddol."

Dau faes a nodwyd ar gyfer gweithredu oedd gwastraff a chludiant.

Drwy fesur faint o wastraff oedd yn cael ei gynhyrchu a deall ei effaith, llwyddodd y cwmni i nodi cyfleoedd i wella effeithlonrwydd a lleihau allyriadau cysylltiedig.

Bu gwelliant amlwg ym maes cludiant hefyd. Drwy wneud newidiadau i ddeunydd pacio a'r ffordd y trefnir cynhyrchion ar baledi, cynyddodd Just Love Food faint o gynhyrchion sy’n cael eu cludo ar bob paled o 25%. Gostyngodd hyn effaith carbon y broses ddosbarthu, tra hefyd yn gwneud gwell defnydd o'r gofod sydd ar gael. 

I Michael, mae dod o hyd i atebion sy’n gwneud synnwyr masnachol yn ogystal ag amgylcheddol yn arbennig o bwysig:

“Mae’n rhaid i chi allu dangos nad yw’r pethau hyn yn ychwanegu costau yn y pen draw.”

“Mae pethau’n anodd i ddefnyddwyr ar hyn o bryd, ac mae’n rhaid i ni wneud popeth a allwn i leihau ein hôl troed carbon tra hefyd yn rheoli costau. Yn ffodus, rydym ni wedi dod o hyd i ambell faes lle mae hynny wedi bod yn gwbl bosibl."

Efallai mai’r peth mwyaf arwyddocaol yw bod Just Love Food wedi profi gwelliant yn ei ôl troed carbon yn 2025 o’i gymharu â 2024, er gwaethaf ehangu ei allu i bobi yn ystod y cyfnod dan sylw. Mae’r profiad hefyd wedi helpu i wneud lleihau carbon yn rhan fwy diriaethol o’r broses o wneud penderfyniadau busnes bob dydd. Drwy ddeall ei allyriadau a chanolbwyntio ar newidiadau y gellir eu cyflawni, mae’r cwmni’n dangos sut y gall cynaliadwyedd a thwf busnes gyd-fynd â’i gilydd.

Mae Michael yn annog busnesau eraill – yn enwedig busnesau bach a chanolig nad oes ganddynt adnoddau pwrpasol ar gyfer cynaliadwyedd – i fanteisio ar y cymorth sydd ar gael,

"Ar ôl cymryd rhan yn y rhaglen a deall sefyllfa bresennol y busnes, byddwn yn annog eraill i wneud yr un peth; yn enwedig busnesau bach a chanolig, lle efallai nad oes gennych yr adnoddau i wneud y gwaith eich hun ac i’w wneud yn dda."

I Just Love Food, mae lleihau carbon yn dod yn rhan o’r ffordd mae’r busnes yn gweithredu ac yn tyfu. Mae hyn yn ei helpu i nodi ffyrdd o weithio’n fwy effeithlon, lleihau ei effaith ar yr amgylchedd, a gwneud penderfyniadau gwybodus ar gyfer y dyfodol.

Gwellwch eich arferion cynaliadwyedd gyda'n Peilot Lleihau Carbon. I gael arweiniad a chymorth arbenigol, anfon e-bost at SustainableFD@gov.wales gyda “Peilot Cynlluniau Lleihau Carbon” yn y llinell bwnc.